我嘅職業係：冥婚輔導員（上）
一個月黑風高嘅晚上，我瞓喺床上，半夢半醒間，突然聽到一把女聲：「你對我已經唔係好似以前咁啦！」
我下意識睜開眼，就見到一男一女兩隻鬼，喺我床前飄嚟飄去。
「你睇到我哋？」女鬼望向我：「咁就啱啦，你嚟評吓理。」
「我……我評理？」我呆一呆。
「係啊，我明明就話，下個星期係情人節，我哋應該去海邊，整個燭光晚餐，度過浪漫嘅夜晚。」
女鬼忿忿不平：「但我老公話，我哋又唔係人，情人節唔關我哋事，同埋我哋冇味覺，燭光晚餐都冇意思。」
哦，雖然我冇女朋友，但平時朋友有感情問題，都成日搵我幫手㗎。
我駕輕就熟咁答：「男女思考模式有啲唔同，男士一般從實際出發，未必咁即時地體會到女士嘅感受同需要。」
我再望向男鬼：「其實你太太只係想感受到你嘅愛，係咩節日、品唔品嚐到晚餐，並唔係重點。」
男鬼若有所思咁點點頭，然後佢哋就消失咗。
我後知後覺咁諗起，喂，佢哋兩個冇腳㗎喎，鬼嚟㗎喎，我啱啱撞鬼喎。
我應該驚，但我依加先嚟驚，又好似太遲。
我諗諗吓就瞓著咗，第二晚，一隻後生男鬼出現喺我床前，怕怕醜醜咁講：「你好，我叫Peter，尋晚你咪幫過張太嘅……」
張太，我諗應該係尋晚隻女鬼。
「我知道我有啲冒昧，但依加好少人有陰陽眼，更少人好似你咁樂於助鬼，所以我嚟請你幫吓手。」
Peter驚驚青青咁，搞到我反而唔好意思驚佢。
我就問：「有咩幫到你？」
Peter慢慢解釋，呢個城市有冥婚嘅習俗，父母希望仔女在天之靈，可以有個伴侶，就會搵同樣未婚而亡嘅異性，幫佢哋搞冥婚。
Peter生前未拍過拖，死後父母幫佢娶咗可愛嘅Mary。
Peter對Mary有好感，但係兩個人生前冇見過面，一嚟就做夫妻，相處得好尷尬。
所以，Peter就想托我，問吓Mary嘅屋企人，Mary有咩喜好，等到情人節當日，向Mary表白。
我感慨：「嘩，結咗婚先嚟表白，咁有趣？」
「以前舊社會，活人都盲婚啞嫁，冥婚就唔覺有問題。」
Peter話：「但依加興自由戀愛，冥婚偏偏冇得揀，大家當然唔習慣啦。」
「咁你都算好彩，屋企人幫你揀咗個你鍾意嘅女仔。」我笑咗。
Peter面都紅晒：「都係㗎，希望……希望Mary都會鍾意我啦。」
第二日，我就憑住Peter畀嘅訊息，去搵Mary嘅屋企人。
家人之間點都有啲秘密，我講埋出嚟，佢哋就相信我真係見過Peter。
為咗Mary嘅婚姻幸福，佢哋都提供咗好多Mary嘅喜好，幫Peter出謀劃策，仲買埋禮物叫我燒畀Peter。
結果Peter嘅表白好成功，兩公婆嘅感情一日千里，兩家人仲封咗封媒人大利是畀我。
幫到人、幫到鬼，仲賺到錢，我自己都好滿足。
自此之後，有唔少冥婚嘅夫妻嚟搵我，有時叫我聯絡家人，有時叫我幫手買嘢，當然最常見嘅都係婚姻輔導。
盲婚啞嫁仲有得揀門當戶對，冥婚真係好少選擇，嗰排有邊個單身異性死咗，家人就即刻舉辦婚事，所以雙方唔夾嘅機率好高。
好彩，正所謂「人之將死，其言也善」，人直情死埋之後，通常都冇生前咁高要求，而且做鬼都冇做人咁複雜。
所以，我幫佢哋調解咗一啲誤會或者矛盾之後，通常兩公婆都可以幸福快樂咁生活落去。
漸漸地，我成為遠近馳名嘅「冥婚輔導員」。
直到有一晚，一隻叫琪琪嘅女鬼嚟搵我，劈頭第一句就係：「我要離婚。」
我習慣性咁講：「唔好衝動，你哋之間係咪發生咗咩問題？」
「我唔愛佢。」琪琪斬釘截鐵咁答。
原來，琪琪年紀輕輕就病死咗，佢父母好傷心，咁啱琪琪嘅同學阿邦因車禍而死，兩家人一拍即合，即刻搞咗冥婚。
人啱啱死嘅時候，靈魂仲未習慣做鬼，意識會有一段時間渾渾噩噩。
所以，當琪琪反應過來，佢已經成為阿邦嘅老婆，瞓埋同一個棺材。
琪琪接受唔到，所以佢希望，我幫手向佢父母傳遞消息，要求離婚。
下集：https://bit.ly/3iQaAY4
將專頁設定為「搶先看」/ "See first"，最新故仔馬上睇！
我收到死鬼阿爸封信：https://goo.gl/AEADyn
緝凶記：http://bit.do/e8s8R
#短故 #短篇 #小說 #陳美濤 #廣東話 #粵語 #tomatochan #我嘅職業係冥婚輔導員
Search